छक्कापञ्जा-२ को सक्कली कथा यस्तो छ…

छक्कापञ्जा-२ को सक्कली कथा यस्तो छ…

काठमाण्डौं/ ‘ए दाजु नसमाऊ नारीमा, हिलो लाग्ला नायलनको सारीमा’ बोलको गीत २0५६ सालमा श्याम नेपाली र लोचन भट्टराईले ‘माछापुच्छ्रे’ एल्बममा सँगै गाएका थिए । SAC द्वारा निर्मित सो एल्बममा श्याम नेपालीले मौलिक नेपाली शब्द र शैलीलाई जीवन्त राखिरहन यो गीत आफैंले गाएका थिए । छक्कापञ्जा-२ को निर्माण पक्षले अहिले उक्त गीतलाई प्रस्तुत गरे त्यसप्रति श्याम नेपालीले गहिरो खेद प्रकट गरेका छन् ।

 

दीपकराज गिरिसहितको निर्माण युनिटले भने आफूहरूले स्रष्टालाई मागेजति र भनेजति पारिश्रमिक वा क्षतिपूर्ति दिने तर, युट्युबबाट नहटाइदिन दबाब र प्रलोभन दिइरहेको स्रष्टा परिवारस्रोतले ट्रीमिडियान्युजलाई जानकारी दिएका छन् । नेपालको प्रतिलिपि अधिकार ऐन अनुसार मौलिक सिर्जनामाथि कुनै पनि सर्जक र उनको परिवारले ५0 वर्षसम्म दाबी गर्न पाउने उल्लेख छ । छक्कापञ्जा-२ को गीत प्रकरण… कसैद्वारा रचित गीत गाउनै नपाउने भन्ने त हुदैन तर, सर्जकलाई श्रेयचाहिँ दिनैपर्दछ । पुरानो भर्सनलाई नयाँ भर्सनमा उतारेर गाएको विश्वसङ्गीत बजारमा कैयन् उदाहरणहरू छन् । तर, सर्जकको वास्तविक पहिचान खुलाउन भने जरूरी छ । वि.सं २0५६ ताका कान्छामगर नेपालीले सिर्जना गरेको ‘नसमाऊ नारीमा’ बोलको गीत एकाएक चलचित्र छक्का पन्जा-२ मा टाइटल गीतका रूपमा बजारमा आएपछि वास्तविक सर्जक कान्छामगर नेपालीका छोरा श्याम नेपालीले त्यसको विरोध गरेका छन् । श्याम नेपालीका छोरा प्रिन्स नेपालीले उक्त गीत एरेन्जका लागि अल्मोडा राना उप्रेतीलाई दिएका थिए।

एरेन्ज सकेपछि अल्मोडाले आफू पनि यो गीत गाउन इन्ट्रेस्टेड भएको बताएपछि प्रिन्स कन्भिन्स थिए । केही समयको अन्तराल पछि अल्मोडाले प्रिन्सलाई फोन गरेर उक्त गीत चलचित्र छक्कापञ्जा-२ लाई दिने कुरा गरे र त्यस गीतको शब्दमा केही चेन्ज गर्ने अनि आफूहरू दुवै जनाले गाउने भनेर प्रस्ताव राख्दा प्रिन्स राजी थिए । तर, प्रिन्स त्यतिबेला छाँगोबाट खसेझैँ भए जब उनलाई केही खबर नै नदिई उक्त गीत रिलिज भयो । न शब्द परिवर्तन गर्दा अल्मोडाले उनीसँग अनुमति लिए न पहिले उनीहरूबीच भएको समझदारीअनुसार सल्लाह नै गरे । न उनको नाम त्यस गीतको टाइटलमा नै राखियो । एकाएक गीत रिलिज गरियो । गीत रिलिज हुदा पहिले डिटेल्समा समेत प्रिन्सको नाम थिएन ।पछिमात्र राखियो । गीत रचनामा दिपकराज गिरी र प्रिन्सको नाम राखिएको छ, के यो अनुमति लिएरै गरिएको हो ? भिडियोको क्रेडिट टाइटलमा संगीतकारको नाम नै छैन ।

 

यो हेर्दा लाग्छ, यो सुनियोजित थियो । यो विषयमा हामीले चलचित्र छक्कापञ्जा-२ का निर्माता तथा कलाकार दीपकराज गिरीसँग बुझ्न खोज्दा उनले- ‘अब रोयल्टी माग्ने वास्तविक सर्जकको नाम राख्ने अलमोडालाई कारबाही गर्नेसम्म गइयो भने त्यो न्यायोचित् होला तर, आफै फिल्मको लागि हुन्छ भनेर गीत दिने अनि गाउन दिएन भनेर लाखौ ख़र्च गरिसकेको निर्माताको ढाड सेक्ने कुरा त राम्रो भएन नि’ भनेर पन्छिने कोशिष गरेका छन् । अल्मोडाले आफूहरूलाई जानकारी नदिएको निर्माता दीपकराज गिरीको भनाई छ । अल्मोडा भने यतिबेला सम्पर्कविहीन छन् । स्रष्टाको सिर्जनालाई अनुमतिबिना आफ्नो भनेर युट्युबमा रिलिज गर्नुचाहिँ के न्यायोचित् हो त ? अर्काको सम्पत्तिलाई मेरो भनेर रातारात हिट हुन खोज्नु कतिको जायज हो ? अलिकति शब्द र बिट चेन्ज गर्दैमा आफ्नो भन्न पाइने कि नपाइने ? करोडौ खर्च गरेर फिल्म बनाउनेले यति त पक्कै पनि विचार गर्नुपर्ने थियो । कान्छामगर नेपालीका छोरा श्याम नेपालीले उक्त गीत गाएर युट्युब मार्फत् सार्वजनिक गरेका छन् । उनले सोही भिडियोमा उक्त गीत कहाँ र कसरी रेकर्ड गरिएको थियो र त्यसको वास्तविकता के हो भन्ने खुलाएका छन् । यो गीत रिलिजलाई लिएर आफ्नो गम्भीर ध्यानाकर्षण भएको समेत बताएका छन् । यो केस यतिकै नछोड्ने र न्यायको लागि अदालत जान पनि पछि नहट्ने उनको भनाई छ । उनी भन्छन् -‘गीतको शब्द जुन हिसाबले परिवर्तन गरिएको छ, त्यो त झन् कान्छामगर नेपालीप्रतिको अपमान हो । अब यो केस कहाँ सम्म पुग्छ त्यो भने हेर्न बाँकी नै छ।

प्रतिक्रिया दिनुहोस

Your email address will not be published.