राजधानीभित्रकै अस्पतालले म्याद गुज्रेको औषधि खुवायो, बालकको अवस्था गम्भीर

काठमाण्डौं,२४ साउन

राजधानीकै एक अस्पतालभित्र रहेको फार्मेसीले म्याद गुज्रेको औषधि बिक्री गर्दा र चिकित्सकले पनि म्यादै नहेरी प्रयोग गरिदिँदा बिरामी बालकको अवस्था गम्भीर बन्न पुगेको छ। सिनामंगलस्थित काठमाडौं मेडिकल कलेजभित्र सञ्चालित फार्मेसीले दुई महिनाअघि नै म्याद गुज्रिसकेको ‘ट्याक्सिन’ नामक औषधि बेचेको हो।

 

आइतबार बेलुकी नौ बजे फार्मेसीले दिएको औषधिको म्याद नहेरी चिकित्सकले समेत बिरामी बालकमाथि प्रयोग गरे। झापाका ५ वर्षीय आरुष सुवेदीलाई म्याद गुज्रेको औषधि चलाउँदा उनको अवस्था गम्भीर बनेको हो। बालककी आमा सुनिता सुवेदीका अनुसार आरुष एक सातादेखि मेडिकल कलेजमै भर्ना भई उपचाररत छन्। ‘डाक्टरले औषधि लेखिदिनेबित्तिकै किन्न गएँ तर फार्मेसीले म्याद गुज्रिएको औषधि दिएछ,’ सुवेदीले भनिन्, ‘तनावमा हुने भएकाले बिरामीका आफन्तको ध्यान म्याद हेर्नेतर्फ पुग्दैन, मेरो पनि पुगेन। तर डाक्टरले म्यादै नहेरि चलाइदिए।’ बालकको अवस्था गम्भीर भएपछि आक्रोशित आफन्तले सोमबार अस्पतालमा तोडफोड गरेका छन्।

प्रतिक्रिया दिनुहोस

Your email address will not be published.